2011-2015 agintaldiko hirugarren aurrekontuen Udalbatza izan da gaurkoa; hirugarren aldia udal aurrekontuak PP-PSEren isileko akordioari esker onartzen direnak. Atzo goizean, komunikabideei esker gobernuak PPk aurkeztutako zuzenketa gehienei oniritzia eman ziela jakiten genuen bitartean, Ogasun ordezkaria gure proposamenak baztertzen ari zen. Akordioa itxia zegoen eta udal gobernuak ez du inolako interesik erakutsi gure proposamenak onartzeko.
Bere lehentasunezko bazkideaz (PP) haratago, minorian dagoen gobernuak ez du oposizioko gainerako taldeen adostasuna bilatzen. Errazagoa da oso gutxi exijitzen duenarengana hurbiltzea, zorrotzagoa denari hurbiltzea baino, nahiz eta hori hiriaren kaltetan izan. Gobernuaren jarrera horrekin galtzen ateratzen diren bakarrak irundarrak dira» baieztatu zuen.
Hiritarrei begira oso polita geratzen da minorian dagoen gobernuak akordiorik handiena bilatzen duela esatea, baina udaletxe honetan ez da hori gertatzen. Duela egun batzuk, Paez jaunak adierazten zuen zabalik zeudela taldeek egin zitzaketen proposamen eta iruzkinak entzutera ahalik eta akordiorik handiena lortuko zuten aurrekontuak lortzeko helburuarekin. EAJ-PNVtik baieztatu dezakegu hori gezurra dela eta gobernu sozialistak bere interes partidistak lehenesten dituela.
Etxeko lanak ondo eginda eta planteamendu zuhur batekin joan gara Udalbatzara. 2,2 milioi euro inguruko inbertsioa proposatu dugu. Jakitun gara Irun langabezia tasarik altuena duen Gipuzkoako udalerria dela, eta horregatik gure taldeak aurkeztutako proposamenek hiritarren ongizatea hobetzea eta tokiko enpresek egin zitzaketen obrei eta proiektuei esker, bertako ekonomia sustatzea zuten helburu.
Badirudi duela hilabete bat onartzen genuen eta gure hirirako hain beharrezkoa den “Ekonomia sustatzeko eta Familiak laguntzeko Inbertsio Plana” EAJ-PNVk Udalbatza honetan aurkezteak ez duela balio. Plan horrekin azaroan bilatzen zen helburuak, gaur ez du balio.
2015ean Gipuzkoako Foru Aldundiak izango duen diru-bilketaz hitz egin da, Fagorren itxieraren ondoriozko panorama ilunaz, etab. Baina, zergatik ez hitz egin azken egunotan entzun ditugun albiste positiboez? Edo zergatik ez kontuan izan Aldundiko zerbitzu teknikoen irizpidea Fagorren eraginez Gipuzkoako aurrekontua doitzea beharrezkoa ez dela diotenean?
Laburbilduz, irundarren bizi kalitatea eta auzoetako eguneroko bizitza hobetzeko helburuarekin gaurko Osoko Bilkurara eraman ditugun 10 proposamenetatik, udal gobernuak bi besterik ez dizkigu onartu. Irunerako proposatzen genituen 2 milioi eurotik gorako inbertsioetatik 250.000 euro bakarrik onartu dizkigute. PSE eta PPren babesarekin onartu diren aurrekontuak hiriko ekonomia suspertzeko, irundarren ongizatea lortzeko eta auzoak hobetzeko helburutik urrun geratzen direla uste dugu. Horregatik guztiarengatik, EAJ-PNVk 2014ko aurrekontu proiektuaren kontra bozkatu du.